celia_van_den_berg.png

Sweef Kommunikasie- en Dramastudio is in 1998 gestig. Die Studio het uitgebrei en 'n naam verwerf as 'n kreatiewe speel en leerplek waar kinders hulleself as bekwaam kan ervaar. Hier kan 'n mens jou passie om saam met kinders in die verbeelkasteel van stories te kuier, uitbeeld.

By TRUK Speelwerk (Transvaalse Raad vir Uitvoerende Kunste) leer ek baie oor opvoedkundige drama. Ek het al vele televisietekste geskryf waaronder Wielie Walie en Onderste Bodem ook tel.

Omdat ek nuuskierig was om uit te vind waarom drama as vak kinders positief beinvloed en meer selfvertroue gee, het ek 'n 10 jaar lange studie onderneem. Eers studeer ek by die Tshwane Universiteit vir Tegnologie, en later by die Universiteit van Pretoria. In 2014 lei dit tot die verwerwing van my doktorsgraad in opvoedkundige drama. My tesis bewys dat drama aan byna al die neuro-opvoedkundige vereistes voldoen en kan dien as 'n metode om lewensvaardighede aan te bied.

Ek is tans (2015) 'n deeltydse dosent by Universiteit Pretoria se Opvoedkunde Departement. In Julie 2015 voltooi ek ook 'n kursus in Neuro-wetenskap by UP.

Die nuutste uitbreiding van Sweef Kommunikasie- en Dramastudio is die skep van 'n volledige kommunikasiekursus (insluitende interpersoonlike kommunikasie) vir kinders. Kommunikasie as vaardigheid is seker een van die grootste geskenke wat jy vir 'n kind kan gee.

Celia van den Berg - Julie 2015

celia_grayscale.jpg
louis_fourie.png

Ek het my Honneurs-graad in drama in 2006 aan die Tshwane Universiteit van Tegnologie voltooi en het in Sang en Regie gespesialiseer. Ek was hoof van die universteit se na-uurse dramakursus en het klas aangebied as lektor in praktiese vertolking.

Ek het Celia van den Berg in 2005 ontmoet en was sedertdien deel van die Sweef-span. Intussen het ek ook radiowerk gedoen as omroeper vir Top Stereo, en as bemarker vir Jacaranda94.2. Ek het ook gehelp met die opleiding van nuuslesers vir Jacaranda asook vir Classic FM.

Ek publiseer in 2010 van my gedigte in die digbundel “Rymreise” en gee sedert 2012 klas by Pathways Studio Pretoria vir volwassenes met veelvuldige gestremdhede, waar ek fokus op die ontwikkeling van sosiale vaardighede deur drama.

Ek bied steeds van tyd tot tyd lesings aan by besighede en akademiese instansies oor drama vir mense met spesiale behoeftes, praktiese vertolkingskunde, asook toespraak aanbiedingsvaardighede.

louis.jpg
wat-se-ander-van-ons.png